Տավուշի մարզ կատարած այցի շրջանակում «Հայանտառ» ՊՈԱԿ-ի տնօրեն Արտյոմ Հայրապետյանը հանդիպում է ունեցել «Սևքարի անտառտնտեսություն» մասնաճյուղի աշխատակազմի հետ։

Այցին մասնակցել են տնօրենի տեղակալ Վահրամ Սեդրակյանը, մասնագիտական ստորաբաժանումների ներկայացուցիչներ։

Մասնաճյուղի աշխատակազմի հետ քննարկվել է անտառային ռեսուրսների արդյունավետ օգտագործման, մասնաճյուղի տարածքում անտառածածկի ավելացման, ինչպես նաև մասնաճյուղի ներուժի և զարգացման հնարավոր ուղղությունների վերաբերյալ հարցերի լայն շրջանակ։

Մասնաճյուղի ղեկավար Մհեր Արզումանյանը ներկայացրել է գույքագրված տեխնիկական և մասնագիտական խնդիրները, առկա կարիքները, առաջարկել դրանց լուծման հնարավորությունները։

Արտյոմ Հայրապետյանը շրջել է նաև մասնաճյուղի տարածքում գործող արտադրամասում, ծանոթացել արտադրական գործընթացին, արտադրանքին և առկա հնարավորություններին, այնուհետև այցելել Աչաջրի անտառպետության անտառային տարածք՝ տեղում ծանոթանալու անտառների վիճակին, օգտագործման ուղղություններին, պահպանվածությանը։

Ընթացիկ աշխատանքների բարելավման, արդյունավետության բարձրացման, անտառային ռեսուրսների խելամիտ օգտագործման և արտադրական կարողությունների զարգացման նպատակով Արտյոմ Հայրապետյանի կողմից տրվել են համապատասխան հանձնարարականներ։