Եռակողմ հանդիպում «Հայանտառ»-ում․ քննարկվել են միջազգային համագործակցության ծրագրի ընթացքն ու առաջիկա անելիքները

«Հայանտառ» ՊՈԱԿ-ի տնօրեն Արտյոմ Հայրապետյանն այսօր հանդիպում է ունեցել ՄԱԿ-ի Պարենի և գյուղատնտեսության կազմակերպության (FAO Armenia) ներկայացուցիչների, շրջակա միջավայրի նախարարության Բնապահպանական ծրագրերի իրականացման գրասենյակ ՊՀ-ի տնօրեն Արմեն Եսոյանի և գրասենյակի ներկայացուցիչների հետ։

Հանդիպմանը մասնակցել են տնօրենի տեղակալներ Սիմոն Պետրոսյանը, Վահրամ Սեդրակյանը։

Հանդիպման նպատակն էր քննարկել գործընկեր կառույցների համագործակցությամբ իրականացվող, «Հայանտառ» ՊՈԱԿ-ի կողմից կատարվող «Հայաստանում անտառների դիմակայության բարձրացում՝ մեղմացման միջոցառումների շնորհիվ հարմարվողականության և գյուղական վայրերում կանաչ տարածքների ընդլայնման միջոցով» ծրագրի ընթացքը, արձանագրված արդյունքները և առաջիկա անելիքները։

Քննարկման առանցքում եղել են նախորդ տարիներին ծրագրի շրջանակում իրականացված միջոցառումների արդյունքների գնահատման հիման վրա արձանագրված խնդիրները, դրանց լուծման հնարավորությունները, ինչպես նաև հետագա գործողությունների պլանավորման և արդյունավետ իրականացմանն առնչվող հարցերը։

2026 թվականի անտառատնկման աշխատանքների սահուն և արդյունավետ ընթացքն ապահովելու նպատակով քննարկվել է կազմակերպչական հարցերի լայն շրջանակ։ Մասնավորապես, անդրադարձ է կատարվել «Հայանտառ» ՊՈԱԿ-ի «Վանաձոր» մասնաճյուղի տարածքում նախատեսվող ջերմատների և անհրաժեշտ ենթակառուցվածքների ներդրման ուղղությամբ իրականացվող աշխատանքներին, առկա խնդիրներին և առաջիկա քայլերին։

«Հայանտառ» ՊՈԱԿ-ի տնօրեն Արտյոմ Հայրապետյանն ընդգծել է ծրագրի շարունակականության, առկա խնդիրների համակողմանի գնահատման և դրանց լուծմանն ուղղված գործողությունների հստակեցման կարևորությունը։ Նա նշել է, որ արդյունավետ պլանավորումը, համակարգված աշխատանքն ու գործընկեր կառույցների սերտ համագործակցությունը կարևոր նախապայմաններ են ծրագրով նախատեսված արդյունքների ապահովման և անտառվերականգնման աշխատանքների արդյունավետության բարձրացման համար։

«Հայաստանում անտառների դիմակայունության բարձրացում՝ մեղմացման միջոցառումների շնորհիվ հարմարեցման և գյուղական վայրերում կանաչ տարածությունների ընդլայնման միջոցով» ծրագիրը ֆինանսավորվում է Կանաչ կլիմայի հիմնադրամի կողմից և համաֆինանսավորվում է Հայաստանի Հանրապետության կառավարության, ՄԱԿ-ի Պարենի և գյուղատնտեսության կազմակերպության, Ավստրիական զարգացման գործակալության, Շվեյցարիայի զարգացման և համագործակցության գործակալության, Բնության համաշխարհային հիմնադրամի և Իտալիայի Բոլցանոյի ինքնավար նահանգի կողմից։